香港響應.台灣發起 #9月無塑生活

我地好開心,比其中一個合作伙伴 Be nice to life 活好點 tag咗玩呢個咁有意義嘅減塑遊戲!(被視為一份子覺得好開心好榮幸呀 )好在仲係九月!無遲到!雖然塑膠嘅出現係應該令人生活得更好,但濫用太多即棄塑膠製品而又無重用同做好回收嘅意識,就會變成大災難!亦都好在女admin平時都有呢個自覺嘅生活習慣,係真材實料唔係得把口,所以唔講咁多廢話,即刻同大家分享下女admin上星期做咗啲咩減塑啦!

1) 月經杯:女admin係女仔,當然會有月事… 轉用月經杯嘅心路歷程係:天生流量比較多,用傳統嘅膠M巾夏天一定會敏感,後來朋友介紹試下用布M巾,但用咗一年發現其實洗係唔難,但由於土地問題,女admin需要係屋企室內晾衫,一遇上潮濕天氣就乾唔切,正諗住買多幾塊布M巾時就遇上月經杯!目前用咗差唔多大半年喇!左面紫色嘅係Lunette Cup,購自 小刺蝟 Happeriod,右面嘅桃紅色係Lily Cup Compact,購自 Sally’s Toy ,呢兩個係我最常用嘅月經杯,Lily Cup Compact因為摺得,女admin會放係手袋以備不時之需(例如以防突發事件、跌咗落地之類就可能換喇!)心思思想試又有好多問題嘅話,可以聯絡佢地問下意見架

2) Grab’N’Go:購自 Be nice to life 活好點 ,女admin一直有使用 Eco Wrap 環保麵包袋,但由於平時都係食腸粉呀、飯呀、麵呀呢啲多,而女admin又有啲手殘,之前用EcoWrap一直都唔係好識包,只能買啲無汁嘅食物例如三文治、大包之類。後來見到Grab’N’Go簡直係心花怒放,太好用喇!女Admin上個星期用過佢黎買腸粉、炒麵、飯都完全無問題,小食店姨姨都係咁問:「咦?呢個未見過喎,係咪新款黎架?呢個方便好多喎!」曾經有個姨姨問我怕唔怕污糟,另一位小食店姨姨就搶答:「你覺得掛係度果啲膠袋就唔污糟喇咩?」其實Grab’N’Go好易洗又好易乾,加上平時注重衛生又會勤力消毒,無問題啦!公司長期都有一套私家餐具,竹籤都慳番~

3) Que Bottle:話說女admin以前係用好大個背囊放好大支水出街,但後來因為膊頭受傷無辦法再成日揹咁重嘅袋,換咗細袋之後問題就黎喇,放唔到水樽點算好?後來比我遇上Que Bottle!佢可以伸長架!伸長後可以放200ml左右嘅液體,但唔伸長都可以就咁飲。圖中係女admin因為小感冒去咗睇中醫,等嘅時候好口渴,就用佢裝水飲喇,好方便!都係購自 Be nice to life 活好點

4) 環保袋:這是常識吧!!!都唔使解釋咁多啦嘛!!

其實女admin平時都有用不銹鋼飲管,不過因為小感冒無飲過凍野,仲有用可重用嘅防水遮袋,但又無遇到出門落雨…其實好多日常小事,轉一轉念就可以做到用少啲即棄嘅塑膠同環保啲,拎少個膠袋,又或者一星期一日 Green Monday又得,帶隻私家杯去Starbucks又得!我地好幸運行係呢條路上面,身邊有好多好好嘅伙伴,比好多idea同意見我地呢個初哥,但有心唔怕遲呀!我地都係一路以來慢慢學習,慢慢做多啲啲再做多啲啲,希望感染到大家!雖然已經九月尾,但不如唔好比佢停啦!我地照tag幾位好伙伴,希望更多人睇到、感染到更多人、影響到更多人

  • No products in the cart.
%d 位部落客按了讚: